دوامة مشاعر

فكرة إنك تلاقي حالك في دوامة مشاعر إنت نفسك مش فاهمها حقيقة بتوجع، لحظات بنحتاج نعيش شعور الخوف، التخبط، الحيرة بس عشان لما نلاقي طريقنا الصح نكون وقتها عم نشعر بمشاعر الفرح، السعادة، البهجة.

كتير أفكار بتمرق علينا باليوم الواحد بتخلي منا بنفس اللحظة يا البطل المقدام، أو اللص إلي بدمه السرقة، أو حتى دور الشرير إلي بس تفكيره منحصر على احتلال العالم بكل مافيه. هاي الأفكار هي مجرد تجارب عم تخوضها باليوم بشكل متكرر وحتى بالشهر والسنة والساعة والدقيقة والثانية.

بس بيجي دورك الحقيقي بإنك تعرف حالك، لما تقرر بذاتك إنت شو التجربة الصحيحة إلي بتحب تضل ترافقك لفترة طويلة من العمر، أو بوضوح أكتر لآخر يوم بحياتك.